धन्य धन्य देवी गीता । आदि...
धन्य धन्य देवी गीता । आदिमाया वेदमाता ।
जाणेल जो अर्था । धन्य मातापितर ॥१॥
एक श्लोक अथवा चरण । अर्थ अनुभव अंगीं लेण ।
भवमोक्षाचें साधन । नलगे कोठें शोधावें ॥२॥
एका चरणाचा अर्थ । राजा जनक जाणत ।
मग विदेहाची मात । अंगीं येउनि ठसावी ॥३॥
एका चरणाचा अर्थ । मुनि वसिष्ठ जाणत ।
शांतीच्या सदनांत । निजशयनीं पहुडला ॥४॥
एका चरणाच अर्थ । पंडुपुत्र धर्म जाणत ।
सत्य भाषण यथार्थ । शत्रुमित्र समान ॥५॥
अर्जुन नरनारायण । हे तों सिद्ध साधक जाण ।
दुष्ट करावया निर्दंळण । तुका म्हणे अवतरले ॥६॥