संत तुकाराम - पुरे एकचि पुत्र माय -पोटी...
पुरे एकचि पुत्र माय-पोटीं । हरिस्मरणें उद्धरीं कुळें कोटी ॥ध्रु०॥
धन्य वंशीं जन्मला भगीरथ । गंगा आणोनि पूर्वज केले मुक्त ॥१॥
गौतमानें आणिली गोदावरी । आपण तरोनि दुजयासि तारी ॥२॥
पांच वर्षाचें ध्रुव बाळ तान्हें । अढळ पदीं बैसलें बहुमानें ॥३॥
तेजःपुंज शीतळ सौख्यदानी । एक चंद्रप्रकाश त्रिभुवनीं ॥४॥
पहा कैसा तो पुंडलिक धीट । उभा केला वैकुंठनायक ॥५॥
रामरुपी जन्मला कीर्तिवंत । अंजनीचे उदरीं हनुमंत ॥६॥
तुका म्हणे हरिसी विन्मुख । गांधारीचे उदरीं शतमूर्ख ॥७॥